كبسولة القواعد العادية
بداية و بعد اول مقاله هبتدي ان شاء الله في عمل كبسوله هندسيه متكامله ، الغرض منها هو ان المهندسين الحديثين التخرج يلموا شغل الموقع في خطوات مبسطه .
و هنبتدي ان شاء الله في اول مرحله من عناصر المنشا و هي القواعد العادية .
القواعد العاديه بيسموها في المواقع البلدي بانها فرشة النظافه و معظم الناس فاكرين انها ملهاش لازمه غير انها تفصل بين الارض و بين تسليح الخرسانه المسلحه لكن الكلام ده خاطئ لحد كبير.
القواعد العاديه بيختلف سمكها و ابعادها بناءا على اجهاد التربه المعروف في تقرير الجسات ، معنى كده ان القواعد العادية ليها تصميم و بتبقى داخلة معايا في الاحمال و اوقات بتبقى شايله احمال مع القواعد المسلحه ، يعني مش بس فرشة نظافه 😊
في بداية الموقع بيبقى في حاجه اسمها نقط مساحة و دي اللي بتبقى نقط على اللوحه و بيسقطها مهندس المساحه على الارض و دي بدايه التنفيذ ، لازم ابقى محافظ على النقط دي بكذا طريقه اشهرها عمل الخنزيره .
الخنزيره هي شده خشبيه قوية و ثابته بتتعمل من عروق و الواح موسكي و لازم تكون تقويتها قويه جدا ، و بتتحط على حدود المبنى على بعد 3 متر من حدود الحفر و بيتحط عليها كل الاكسات اللي على اللوحه و بتشتغل من اول المنشا لحد اخره و ضروري تكون ثابته و حاجه كده زي المناطق العسكريه 😉 ممنوع الاقتراب او التصوير 😉
يتم عمل نجارة القواعد العاديه من الواح اللتزانه (او ايا كان حسب متطلبات المقايسه ) مع المحافظه على ابعاد القواعد طول و عرض و سمك و تثبيتها طبقا للوحة التنفيذ بعد مطابقة الاكسات اللي على اللوحه بالاكسات اللي على الخنزيره .
يتم تثبيت القواعد من 3 اتجاهات .. اتجاهين منهم تبع الاكسات و الخيطان .. طيب التالت منين ؟!!
قبل البدء في القواعد العادية انا كمهندس ببقى مجهز الارض و الحفر على منسوب التأسيس المطلوب .
طيب ايه هو منسوب التاسيس و اجيبه ازاي ؟ بمنتهى البساطه بيبقى عندي نقطه مهندس المساحه موقعها لي معلومة الاحداثيات بقدر منها احدد منسوب الارض الطبيعيه و عمق الحفر اللي هنفذه و هو ده منسوب التأسيس بتاعي .. المنسوب اللي هوصله بعد الحفر اللي مطلوب في اللوحه يكون قاع القواعد العاديه . و ده هجيبه عن طريق ميزان القامه .
بعد تثبيت القواعد على الاكسات و منسوب التاسيس يتم تقويتها بتربيطهم كلهم مع بعض من فوق و من تحت و بعدها يتم صب الخرسانه ، و الخرسانه العاديه بتبقى 1م3= 5 شكاير اسمنت +0.8م3 سن +0.4م3 رمل + مياه نظيفة و مختبره
دي كده كبسولة مختصره عن القواعد العاديه و تنفيذها في الموقع .
لا تنسوني بصالح الدعاء
كبسوله هندسيه
تعليقات
إرسال تعليق