كبسولة الاعمدة columns
الاعمده هي العنصر الثالث في المنشأبعد القواعد العادية و المسلحه .
بداية : قبل البدء في الاعمده نرجع شوية للقواعد ، اماكن الاعمده بتتحدد من النقط المساحيه على حسب اللوحه ، و كمان دايما بيبقى العمود في نص القاعده من كل اتجاهاتها و بداية الشغل في الاعمده اصلا بيبتدي قبل صب القواعد . ازاي بقى ؟؟
قبل صبة القواعد المسلحه بحطط الاعمده و بحط اشاير الحديد للاعمده في مكانها الطبيعي من الاكسات و اشاير الاعمده بتكون معمول حسابها جوه القاعده و برجل و بتبقى فوق القاعده بطول 60*اقطر السيخ او 1 متر ايهما اكبر و دي وصلة الشد !!
طيب السؤال اللي لازم يتسأل في الحاله دي:
ليه بنعمل وصلة شد في الاعمده مع ان الاعمده بتشيل احمال ضغط ؟
الاجابة باختصار هي ان في حالات معينه الاحمال بتبقى غير منتظمه مثلا في الاحمال الديناميكيه او الزلازل .
يعني في حالة الزلزال لا قدر الله الاحمال كلها بتتقلب . الشد بيقلب ضغط و الضغط بيقلب شد (شغل جنان يعني )😂😂
و بناءا عليه احنا لازم نبقى واخدين معامل امان كويس لان دايما وصلة الشد اكبر من وصلة الضغط .
بعد كده نبدأ بقى في شغل الاعمده : نبدأ في الشده الخشبيه للاعمده و دي معناها اننا بنعمل تربيط بين الاعمده و بعضها و بعد الشده بنشتغل في الحداده . حديد العمود بيتكون من اسياخ راسيه و كانات ملفوفه على شكل العمود بتبقى متحدده في اللوحه التصميميه .
اولا : تسليح الاعمده .. * اسياخ راسيه و دي بتبقى التسليح الرأسي للعمود و ده وظيفته الرئيسيه انه يقاوم احمال الرياح و الزلازل في العمود و يحمي اركان العمود من الكسر و في بعض الاحيان في التصميم يتم مقاومه الانبعاج للعمود بواسطته .
* الكانات و دي بتبقى واخده شكل قطاع العمود .. جواها بيوت بتحافظ على توحيد المسافات بين الاسياخ الرئيسيه و بيبقى في قفل للكانه و يتم تربيطه كويس و القفل ده مقداره 10*القطر .. قطر الكانات غالبا بيكون 8مم او 10مم
و الوظيفة الرئيسيه للكانات هي اانها بتقاوم احمال القص الواقعه على العمود . و في اوقات كتير بيبقى في تكثيف للكانات في مكان وصلة الاسياخ مع الاشاير القديمه و ده لمقاومة احمال القص .
ثانيا : نجارة العمود .. عبارة عن تقفيل للعمود باللتزانه مع احترام قطاع العمود و بعدها وزن العمود يعني المحافظه على راسيته عن طريق ميزان خيط .. و بعدها تقوية العمود و دي عن طريق عمل احزمة كل 40سم من العمود علشان قطاعه ميتغيرش بعد صبة الخرسانه
نصيحه : و انتا بتصب الاعمده يفضل تبدأ بالعمده اللي في نص الدور وده ليه بقى ؟؟
الاجابه علشان تمسك لشده الخشبيه كلها في بعض ولا تتعرض بعض الاعمده للميل .
لو في ملحوظه او سؤال اتمنى محدش يبخل عليا به
لا تنسوني بصالح دعواتكم
كبسولة هندسيه
تعليقات
إرسال تعليق