الفرق بين السملات و الشدادات و الميد

في حاجات بيبقى فيها لغبطه حتى في المسمى بتاعها في الموقع ، و السؤال اللي بيطرح نفسه دايما : 

هو ايه الفرق بين الشداد و السمل و الميده ؟ 

نبدأ اولا بالشداد : الشداد عباره عن كمره بين القواعد و بعضها و لكن بتكون موجوده بين قواعد الجار و بعضها او قواعد الجار مع القواعد المنفصله بتاعتنا .. بتكون قطاعاتها كبيره و تسليحها اتقل من السملات و الميد وده لعدة اسباب 

* تصميم الشداد بيبقى على الحمل بتاع العمود و بما انها قواعد جار يبقى العمود مش موجود في مركز القاعده و دي فايدة الشداد .. بيعمل حمل زياده على القاعده علشان متتقلبش بسبب ان حمل العمود عليها مش في المركز . 

* ربط القواعد مع بعضها بصورة عامه و ده علشان ميحصلش تفاوت في الهبوط او اختلاف للهبوط بين نقطه و التانيه  . 

ثانيا السملات : السمل عياره عن كمره تشبه كمرة السقف بشكل كبير بتبقى غالبا قطاع واحد و مش محتاج تصميم او بيبقى في وقت كبير 25*70سم .. و ده ليه ؟؟ لان فايدتها الاولى انها بتشيل حوائط الدور الارضي مع ربط القواعد مع بعضها فقط لا غير . 

و بكده هي ملهاش منسوب معين تتنفذ فيه . ممكن تكون مع منسوب القواعد او اعلى من ظهر القاعده و في بعض الاحيان ملهاش علاقة بالقاعده و بتربط بين الاعمده بس .

تسليح السملات بيبقى زي الكمرات بالظبط (سفلي يقف عند العمود و علوي يمتد لربع بحر الكمره المجاوره لها ) 

ثالثا الميده : كمرات تنفذ في منسوب القواعد المسلحه و فايدتها برضه الربط بين القواعد المسلحه و تشيل احمال المباني برضه ، اومال ايه الفرق ؟؟ 

الفرق هو ان في حالات التربة الطينيه بتكون الميد هي الحل الامثل و ده لان الهبوط بيبقى غير منتظم و تسليح الميده بيبقى سفلي زي العلوي مفيش فيهم اختلاف  .    

في سؤال بقى ممكن يتسأل وهو : طيب ما هو احنا كده ممكن نستخدم الشدادات في ال3 حالات و ده لانها اكثر امانا في ال3 انواع ؟ 

ساعتها هجاوب حضرتك ان فعلا ده صحيح و لكن بتيجي هنا بند التكلفه .. انتا كمهندس بتدور على كفائه عاليه و باقل تكلفه و عليه مش من الهدسه خالص اني ادور على الامان الزياده بتكلفه اعلى من الممكن . 

يني انا المفروض اخد في اعتباري الكفائه و الامان و التكلفه في نفس الوقت 😉😉 

ولا تنسونا بصالح دعواتكم 

                                                             كبسولة هندسية